ව්‍යවස්ථා සංශෝධනය ගැන ශ්‍රේෂ්ඨාධිකරණ තීන්දුව

ජනමත විචාරණ නෑ: තුනෙන් දෙක ඇති

දහඅටවැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත පාර්ලිමේන්තුවේ තුනෙන් දෙකක බහුතර ඡන්දයකින් සම්මත විය යුතු බවට ශ්‍රේෂ්ඨාධිකරණය තීන්දු කර ඇතැයි කතානායක චමල් රාජපක්ෂ මහතා පාර්ලිමේන්තුවට ඊයේ (7) දැනුම් දුන්නේය.එම පනත් කෙටුම්පතෙහි ජනමත විචාරණයක දී ජනතාවගේ අනුමැතිය අවශ්‍ය වන කිසිම විධි විධානයක් නොමැති බවටත් ශ්‍රේෂ්ඨාධිකරණය තීන්දු කර ඇති බවද කතානායකවරයා ප්‍රකාශ කෙළේය.

විස්තර »

සංශෝධනය රටට යහපත්:
පක්‍ෂ භේද නැතිව ඡන්දය දෙන්න

අස්ගිරි මහා නා හිමි සහ මල්වතු
අනු නා හිමි ඉල්ලා සිටිති

යෝජිත ව්‍යවස්ථා සංශෝධනයෙන් රටට අවැඩක් සිදු නොවන බැවින් පක්ෂ විපක්ෂ බේදයන්ගෙන් තොරව එයට සහය පළ කිරීම වරදක් නොවන බව අස්ගිරි පාර්ශ්වයේ මහානායක උඩුගම ශ්‍රී බුද්ධරක්ඛිත මහනාහිමියෝ සහ මල්වතු පාර්ශ්වයේ අනුනායක නියංගොඩ විජිතසිරි නාහිමියෝ පවසති. බල ලෝභීත්වය මත පදනම්ව දේශපාලනය කිරීමෙන් රට දියුණු කළ නොහැකි බවත් පක්ෂ විපක්ෂ බේදයෙන් තොරව රටේ අභිවෘද්ධිය සඳහා ගන්නා ක්‍රියාමාර්ගවලදී සැවොම එකතුවීම ජනතා අපේක්ෂාව බවත් උන්වහන්සේ දෙනම ප්‍රකාශ කරති.

විස්තර »

‘පබා’ගේ සහායත් ආණ්ඩුවට

එක්සත් ජාතික පක්ෂයේ ගම්පහ දිස්ත්‍රික් පාර්ලිමේන්තු මන්ත්‍රීනි උපේක්‍ෂා ස්වර්ණමාලි මහත්මිය ද 18 වැනි ව්‍යවස්ථා සංශෝධනයට සහාය පළකරන බව ප්‍රකාශ කරයි. ඒ අනුව නව ව්‍යවස්ථා සංශෝධනය සම්මත කැර ගැනීම සඳහා අද පාර්ලිමේන්තුවේ පැවැත්වෙන ඡන්ද විමසීමේදී ඇය ඊට පක්ෂව ඡන්දය දෙනු ඇත.රටේ ඉදිරි අනාගතය ජනාධිපති මහින්ද රාජපක්‍ෂ මහතා අත රැඳී ඇති බව ඊයේ අරලියගහ මන්දිරයේදී ජනාධිපතිවරයා හමු වූ උපේක්‍ෂා ස්වර්ණමාලි මන්ත්‍රීවරිය ප්‍රකාශ කළාය.

මා වනසා දමා ව්‍යවස්ථා සංශෝධනයත්
රටේ ඉදිරි ගමනත් වළක්වන්න හදනවා

ඒ ගැන පුවත්පතක පළ වූ ලිපියක් මා දුටුවා - ජනපති

නව ව්‍යවස්ථා සංශෝධනය හා රටේ ඉදිරි ගමන වළක්වාලිය හැකි එකම මඟ තමා සහ තම පවුලේ තවත් දෙදෙනෙකු ඝාතනය කිරීම බව පවසමින් පුවත්පතක පළ වූ ලිපියක් දුටු තමා පුදුමයට පත් වූ බව ජනාධිපති මහින්ද රාජපක්ෂ මහතා ප්‍රකාශ කරයි. තමා ඝාතනය කොට ඉදිරියට පැමිණීමට දෙදෙනෙකුට හැකියාව තිබෙන බව එම ලිපිය මඟින් පෙන්වා දී ඇති බව, පවසන ජනාධිපතිවරයා ශ්‍රී ලංකාවේ ප්‍රජාතන්ත්‍රවාදය මෙය දැයි ප්‍රශ්න කෙළේ ය.

විස්තර »

එජාපයෙන් පාර්ලිමේන්තු ආ මන්ත්‍රීන් 15කගේ
සහාය රජයට

එක්සත් ජාතික පක්ෂයේ අලියා ලකුණින් පාර්ලිමේන්තුවට තේරී පත් වී සිටින මන්ත්‍රීවරුන් අතුරින් 15 දෙනෙකුට අධික පිරිසක් යෝජිත ව්‍යවස්ථා සංශෝධනයට ඊයේ සවස් භාගය වන විට සහාය පළ කිරීමට තීන්දු කර තිබිණි. මුස්ලිම් කොංග්‍රස් නායක රවුෆ් හකීම් මහතා ඇතුළු මන්ත්‍රීවරු අට දෙනෙකු අද (08) පාර්ලිමේන්තුවේදී නව ව්‍යවස්ථා සංශෝධන යෝජනාවට පක්ෂව ඡන්දය ප්‍රකාශ කරන බව සඳහන් කැර ඇත.එක්සත් ජාතික පක්ෂයේ හිටපු ඇමැතිවරයෙකු වූ මහනුවර පාර්ලිමේන්තු මන්ත්‍රී අබ්දුල් කාදර් මහතා ද නව ව්‍යවස්ථා සංශෝධනයට පක්ෂව ඡන්දය ප්‍රකාශ කරන බව ප්‍රකාශ කෙළේ ය.

විස්තර »